«Թաթոյան» հիմնադրամի նախաձեռնությամբ հուլիսի 3-ին տեղի ունեցավ բանակցությունների ժամանակ արդյունավետ համոզելուն նվիրված թեմայով դասընթացը։ Կոնֆլիկտաբան, բարդ բանակցությունների միջազգային կարգի մասնագետ Արթուր Մարտիրոսյանը ներկայացրեց բանակցությունների ժամանակ գրագետ և համոզիչ ելույթ ունենալու, զրուցակցի մանիպուլյացիաներից խուսափելու և փաստարկների միջոցով պահանջված արդյունքին հասնելու մեթոդները և պատասխանեց ներկաների հարցերին։
«Մենք, իհարկե, այսպիսի կարճ դասընթացով հմտություններ ձևավորելու նպատակ չենք դնում, ավելի շատ շեշտադրում ենք, թե ինչ ուղղություններով կարող են զարգանալ այդ հմտությունները, որպեսզի բանակցությունների արդյունքում գրանցվի ցանկալի արդյունք՝ առանց վնասելու միջանձնային հարաբերությունները»,- ասաց Արթուր Մարտիրոսյանը։
«DSA խորհրդատվական խումբ» ընկերության գլխավոր տնօրեն Դավիթ Անանյանը նշեց, որ բիզնեսում ևս շատ կարևոր է արդյունավետ հաղորդակցության և հատկապես դիմացինին համոզելու կարողությունը. «Այսօրվա հանդիպման գլխավոր մեխն այն էր, որ թե՛ ներքին, թե՛ արտաքին հաղորդակցության շրջանակում պետք է ունենաս հստակ պատկերացում, որ համոզելը ոչ թե պարտադրանք է, այլ լսելու, հասկանալու, ապրումակցելու և փաստարկելու գործընթաց»։ Մասնակիցներն առանձնացրին դասախոսության ընթացքում ներկայացված այն օրինակները, որոնք կարևոր ազդեցություն են ունենում հաղորդակցությունների տարբեր մակարդակներում։ «Ինձ տպավորեց այն փաստը, որ մեր գործողությունների ժամանակ ավելի հաճախ գերակշռում են էմոցիաները, և մենք չենք օգտագործում ուղեղի այն հատվածը, որը պատասխանատու է ռացիոնալ մտածողության համար։
Բացատրությունն այն է, որ այդպես ուղեղը հանգստանում է»,- ասաց Հայաստանի ամերիկյան համալսարանի (ՀԱՀ) ուսանող Լյուսի Խալաթյանը։ Արուս Խլոպուզյանն էլ նշեց, որ դասընթացի արդյունքում հասկացավ, թե ինչպես պետք է զարգացնել համոզելու հմտությունը։ «Նախկինում ես այլ պատկերացում ունեի բանակցությունների հմտությունների և արդյունավետ հաղորդակցության վերաբերյալ, բայց հիմա պարզեցի, թե այն որքան կարևոր է ոչ միայն մասնագիտական, այլ անգամ անձնական կյանքում»,- նշեց նա։
Հանդիպմանը մասնակցում էին հիմնականում ուսանողներ, տարբեր ոլորտների երիտասարդ մասնագետներ։
Հիշեցնենք, որ առաջին դասընթացը նվիրված է եղել առաջնորդների հաղորդակցության հմտությունների զարգացմանը։
You must be logged in to post a comment.